Почитувани сограѓани,

Со огромна чест, чувство на одговорност и уште поголема љубов кон нашиот град, ви ја претставувам мојата кандидатура за градоначалник на Општина Виница. Ќе бидам градоначалник не само на хартија туку и во практика – за секој еден млад човек, за секој пензионер, за секоја мајка, татко, ученик и работник. За сите нас, еднакво! Стојам пред вас со јасна цел – Виница да биде место на кое сите ќе се гордееме! Нашата Виница има душа, има традиција и има сила. Време е таа сила да ја претвориме во нова енергија – енергија на развој, чиста животна средина, подобра инфраструктура и нови можности за секој наш сограѓанин.

Верувам дека можеме повеќе и подобро. Верувам дека нашите деца заслужуваат град во кој ќе растат со насмевка и сигурна иднина. Верувам дека заедно можеме да ја претвориме Виница во современа, зелена и просперитетна општина. Одлучив да се кандидирам затоа што: - Сакам да ја вратиме работата и чесноста во општината; - Сакам земјоделците конечно да добијат вистинска поддршка, а не само предизборни ветувања; - Сакам Виница да биде чиста, организирана, уредена, со повеќе зелени површини, со грижа за младите и за најстарите; - Сакам власт што оди пеш меѓу народот, а не само со џипови пред избори.

Со почит и благодарност,

Гоце Милевски

СОВЕТНИЧКА ЛИСТА НА СОЦИЈАЛДЕМОКРАТСКИОТ СОЈУЗ НА МАКЕДОНИЈА И КОАЛИЦИЈАТА ЗА ОПШТИНА ВИНИЦА

  • 1. Зоран Стоименов
  • 2. Марина Костов
  • 3. Венцо Вуинов
  • 4. Златко Постолов
  • 5. Звонко Вангелов
  • 6. Александра Евтимова
  • 7. Бојан Ангелов
  • 8. Верица Тодорова
  • 9. Марина Стојанова
  • 10. Ана Арсова
  • 11. Благој Илиев
  • 12. Борче Петров
  • 13. Дарко Костадинов
  • 14. Весна Спасова
  • 15. Игорчо Христов

Почитувани наши сограѓани, како кандидати за советници во Советот на Општина Виница, како ваши соседи, сограѓани и, пред сѐ, луѓе од вашето секојдневие, добро ги познаваме и ги чувствуваме проблемите и потребите на секој од вас. Нашата мисија е да ја направиме општината урбано место за живеење преку подобрување на инфраструктурата, социјалната сигурност и безбедност на граѓаните, поддршка за малите и средните бизниси, создавање нови можности и поддршка на младите и грижа за секое населено место со цел конкретен напредок во заедницата. Преку конструктивни разговори, предлози и идеи од вас граѓаните, ние како советници ќе дадеме огромен придонес со работа, чесност и транспарентност за реализација на вашите идеи, барања и предлози и заедно ќе изградиме општина во која ќе има подобра иднина за сите нас.

ШТО НАПРАВИВМЕ НИЕ:

  • Реализирани повеќе од 200 проекти
  • Асфалтирани повеќе од 40 улици во градот и населените места и заедно со асфалтираните регионални патишта изнесува околу 45 км
  • Намален е долгот на Општина Виница
  • Изградена е социјална зграда
  • Спортска сала во ООУ „Славчо Стојменски“ Виница
  • Промена на старите азбестни цевки со ПЕ во градот Виница и с. Јакимово
  • Проширена е филтер-станицата за вода од 100 на 150 л/сек. и приклучено е с. Лески на виничката водоводна мрежа
  • Започната реконструкција на кино салата во Виница
  • Регулација на коритото на Градечка Река во должина од 1 020 м (целата должина е 1200 м)
  • Започната е изградба на покриен градски пазар;
  • Реконструкција на 22 куќи на социјално ранливи семејства од ромска националност
  • Реновиран е интернатот во с. Блатец
  • Реконструкција на булеварот „Маршал Тито“ во Виница во должина од 1 200 м
  • Замена на покривната конструкција во ООУ „Гоце Делчев“ во Виница

А ШТО (НЕ) НАПРАВИЈА ТИЕ?!

  • Зголемени давачките за данок на имот (2024)
  • Зголемени давачките за постојните комунални услуги и воведени давачки за нови услуги (во континуитет)
  • Нереализиран ниту еден капитален проект наведен во програмата на ВМРО-ДПМНЕ за периодот 2021 ‒ 2025 (нова автобуска станица, спа-центар во с. Истибања, изградба на туристичка викенд-населба на Плачковица, изградба на локален пат Трсино ‒ Голак, изградба на нова индустриска зона во м. Поповец)
  • Неизграден нов булевар
  • Нефункционално ЈП (ЈП „Солидарност“ Виница)
  • ЈП „Солидарност“ веќе со години тоне во долгови и ниту актуелниот ниту претходните директори не успеаја да го консолидираат претпријатието, иако на неколку пати ги зголемија давачките за комуналните услуги и воведоа и нови со што директно имаше финансиски импликации за граѓаните во вид на зголемени сметки за комуналните услуги
  • Нефункционална локална самоуправа
  • Во периодот 2021 ‒ 2025 се примаа кадри што не придонесоа на никаков начин да се подобрат услугите за граѓаните. Нивните внатрепартиски препукувања доведоа до тоа да има смени во секретарските позиции во Општина Виница, а да нема апсолутно никаков ефект во работењето на општината
  • Несоодветен кадар во образовните институции
  • Во образовните институции, покрај неквалитетните кадровски решенија на раководни позиции, се прима и кадар со несоодветно образование, што дополнително влијае врз квалитетот на образованието

МОЈАТА ВИЗИЈА

Зошто се кандидирате? Што е мотивот?

Се кандидирам за градоначалник на Виница затоа што искрено верувам во потенцијалот на нашиот град и луѓето што живеат тука. Моја мотивација е да донесам вистински промени преку чесно, одговорно и транспарентно работење. Ќе се залагам за развој на локалната економија, подобра инфраструктура и квалитетни услови за младите и семејствата. Сакам Виница да биде град во кој сите ќе имаат можност за подобар живот, а мојата врата ќе биде отворена за секој граѓанин. Време е за нова енергија и искрено лидерство. Ќе работам посветено да ги вратиме чесноста, безбедноста, достоинството и развојот во нашата општина!

Колку е важно да се има визија за општината, за нејзино подобро функционирање и за нејзин развој. Дали во тој контекст е потребно да се има и визија за општеството во целина?

Имањето визија за општината е клучно за нејзино подобро функционирање и долгорочен развој. Таа овозможува јасно насочување на ресурсите, стратегиско планирање и активно вклучување на граѓаните. Но локалната визија не може да биде целосно остварлива без поширока визија за општеството во целина. Само со заеднички цели на локално и национално ниво може да се обезбеди одржлив и праведен развој.

Колку се важни младите за нашата општина?

Младите во Виница се клучни за развојот и иднината на општината. Тие носат нови идеи, енергија и иновации што го движат напред локалниот развој. Влијанието на младите се чувствува во образованието, културата и спортот, што ја збогатува заедницата. Инвестирањето во нивниот потенцијал значи сигурна и успешна иднина за Виница.

Како гледате на општата безбедност на граѓаните? Кои се проблемите и како може да се решаваат?

Општата безбедност во Виница е предизвик, особено поради непочитување на сообраќајните правила, како што се прекумерна брзина, неносење кациги и сл. Недоволната контрола од страна на полицијата и лошата инфраструктура, како што се неосветлените улици и недоволно обележаните пешачки премини, ја влошуваат ситуацијата. За подобрување, потребни се поинтензивни контроли, подобрување на сообраќајната инфраструктура и едукација на граѓаните за важноста од безбедно однесување.

Заедно да ги менуваме состојбите!

Почитувани сограѓани,

Време е за нова енергија, нови идеи и искрено партнерство со вас – жителите на Виница. Време е за локална власт што слуша, работи, гради и обединува. Мојата визија е Виница да стане модерен, одржлив и пријателски град за сите генерации. Со одговорен пристап и транспарентна работа, заедно ќе ги менуваме состојбите! Во продолжение ви ги претставувам клучните приоритети и насоки на мојата програма, поделени по целни групи и области:

Образование:

    • Реконструкција и енергетска ефикасност на училиштата и градинките.
    • Поддршка за наставници и воведување современи методи во наставата.
    • Бесплатни училишни материјали за деца од ранливи семејства.

Култура:

  • Поддршка на локални уметници, фолклорни друштва и културни настани.
  • Организирање Виничко културно лето со концерти, изложби и театар.
  • Зачувување и промоција на културното и историското наследство.

Спорт:

    • Изградба на спортски сали, игралишта и изградба на нови спортски зони.
    • Финансиска поддршка за младински спортски клубови.
    • Организирање спортски натпревари и турнири за сите возрасти.

Урбана мобилност и велосипедски сообраќај:

  • Изградба на велосипедски патеки низ градот и кон селата.
  • Воведување безбедни паркиралишта за велосипеди кај училишта, пазари и јавни институции.
  • Кампања „Со велосипед на работа/во училиште“ за поттикнување здрав и еколошки транспорт.
  • Финансиска поддршка за млади и ученици за купување велосипеди.

КАПИТАЛНИ ПРОЕКТИ

Изградба на дом за стари лица

Опис на проектот

Изградбата на дом за стари лица во Виница претставува важен проект што ќе го подобри квалитетот на животот на повозрасната популација во општината. Со оглед на растечката потреба од социјална заштита и поддршка, овој дом ќе обезбеди безбедна, удобна и пријатна средина каде што старите лица ќе можат да ја добијат потребната нега и внимание. Објектот ќе биде современо опремен, со простории за индивидуален и групен престој, медицинска служба, простории за рекреација и социјални активности. Инфраструктурата ќе биде приспособена за лица со посебни потреби, со пристапни патеки и рампи. Проектот ќе создаде и нови работни места за локалното население, со што ќе придонесе и за економски развој. Домот ќе биде место каде што старите лица ќе се чувствуваат вреднувани, заштитени и дел од заедницата, овозможувајќи им достојно и активно стареење во нивниот роден крај.

Влијание на проектот:

Проектот ќе обезбеди подобра грижа за старите лица, ќе создава нови работни места и ќе ја зајакнува заедницата во Виница преку социјална поддршка и вклученост.

Целна група: Пензионери

Изградба на булевар на влезот во Виница

Опис на проектот

Изградбата на нов булевар на влезот во Виница од страната на Кочани претставува значаен инфраструктурен проект што има цел да го подобри сообраќајниот проток и безбедноста во регионот. Булеварот ќе биде главен влезен пат кон градот, со модерни сообраќајни решенија, вклучувајќи двонасочни сообраќајни ленти, тротоари за пешаци и велосипедски патеки. Проектот предвидува и осветлување, зелени површини и поставување сообраќајни знаци за подобра организација на сообраќајот. Оваа изградба ќе го олесни пристапот до Виница и ќе придонесе за економски развој преку подобрена инфраструктура. Со реализацијата на булеварот се очекува значително да се намали сообраќајниот метеж и да се подобри безбедноста на сите учесници во сообраќајот. Проектот ќе биде голем чекор кон модернизација на сообраќајната мрежа во регионот.

Влијание на проектот:

Со изградбата на булеварот, ќе се намали сообраќајниот метеж и ќе се овозможи нормален сообраќај во тој дел од градот.

Целна група: Сите жители на Општина Виница.

Решавање на атмосферската канализација

Опис на проектот

Атмосферската канализација во Виница претставува клучен инфраструктурен проект насочен кон собирање и одведување на атмосферските води од улиците и јавните површини. Со цел да се намалат поплавите и оштетувањата на патната и урбаната инфраструктура, се изработува систем што ги собира дождовните води преку сливници, канали и цевководи. Проектот вклучува анализа на хидролошките услови, избор на соодветен капацитет на цевките и нивно правилно позиционирање за оптимално одведување на водата до најблиските природни водотечни канали или реки. Во решението се вклучени и заштитни мерки за спречување ерозија и контаминација. Важно е редовно одржување и чистење за беспрекорно функционирање. Овој систем ќе го подобри квалитетот на животот и ќе ги намали ризиците од водени штети во Виница.

Влијание на проектот:

Ќе се намалат поплавите, ќе се заштитат домовите и патиштата, ќе се подобри јавната хигиена и безбедност и ќе се создадат подобри услови за живот и урбан развој на градот.

Целна група: Сите жители на Општина Виница

ПРОЕКТИ

Сообраќајно решение во градот

Опис на проектот

Сообраќајното решение за паркингот во Виница вклучува организирање зонско паркирање, јасно обележување на местата, воведување временски ограничувања и воведување еднонасочен сообраќај околу паркингот за полесен проток и зголемена безбедност на пешаците и возилата.

Влијание на проектот:

Со ова решение ќе се создаде ред во паркирањето и ќе се овозможи нормално функционирање во градот во однос на сообраќајот.

Целна група: Сите жители на Општина Виница

Спортска сала во ООУ „Гоце Делчев“ Виница

Опис на проектот

Изградба на спортска сала за учениците во ООУ „Гоце Делчев“ Виница што ќе придонесе за поквалитетна настава во однос на спортските активности на учениците.

Влијание на проектот:

Со овој проект ќе се овозможи поквалитетна настава за учениците во однос на спортските активности.

Целна група: Ученици, локални спортски здруженија

Изградба на скејт-парк

Опис на проектот

Изградбата на скејт-паркот ќе придонесе за поголема активност на младите во спортските активности, со што се овозможува нивна подобра социјализација, а, секако, и напуштање на модерните секојдневни навики.

Влијание на проектот:

Изградбата на скејт-парк во Виница ќе поттикне младински активности, спорт и развој на урбаната култура.

Целна група: Млади

Изградба на велосипедска патека

Опис на проектот

Проектот предвидува изградба на велосипедска патека за безбедно и одржливо движење на велосипедистите. Патеката ќе ја поврзува урбаната и приградската зона, ќе придонесе за намалување на сообраќајниот метеж и загадувањето и ќе поттикне здрави животни навики.

Влијание на проектот:

Подобрување на безбедноста, намалување на загадувањето и поттикнување здрав и одржлив начин на транспорт.

Целна група: Сите жители на Општина Виница

Нова автобуска станица

Опис на проектот

Проектот предвидува изградба на нова, модерна автобуска станица со подобрени содржини за патниците и превозниците. Станицата ќе овозможи поефикасен јавен превоз, зголемена безбедност и комфор, како и подобра поврзаност меѓу градовите и регионите.

Влијание на проектот:

Подобрување на јавниот превоз, зголемување на безбедноста и комфорот и олеснување на поврзаноста меѓу регионите.

Целна група: Сите жители на Општина Виница

Уредување, реконструкција и оспособување на јавните објекти (домови) во населените места

Опис на проектот

Проектот вклучува уредување, реконструкција и оспособување на јавните домови во населените места со цел подобрување на условите за социјални, културни и образовни активности. Овие обновени простории ќе ја зајакнат заедницата, ќе овозможат поголема вклученост на граѓаните и ќе го подобрат квалитетот на животот.

Влијание на проектот:

Подобрување на заедницата, зголемување на социјалната активност и подобрување на условите за образование и култура.

Целна група: Сите жители на Општина Виница

Воведување јавен градски превоз во градот и населените места

Опис на проектот

Во насока на унапредување на урбаниот живот, ќе воведеме јавен градски превоз. Овој чекор ќе овозможи подобра поврзаност, полесно движење и еколошки поприфатлив транспорт за сите граѓани, со што ќе се зголеми квалитетот на секојдневното живеење.

Влијание на проектот:

Јавниот превоз ќе ја зголеми мобилноста, ќе го намали загадувањето и ќе придонесе за поудобен урбан живот.

Целна група: Сите жители на Општина Виница

МЕСНИ ПРОЕКТИ

Виница

    • Реконструкции на улици во градот Виница (Плачковички одред, Страшо Пинџур, Кочо Рацин, Никола Карев, Христо Узунов, Глигор Прличев, Пролетерска, Пионерска, Ѓорче Петров, Ванчо Прке, Маршал Тито, Ангел Винички, Македонска, Пиринска)
    • Поставување бехатон на малите улици и тротоарите
    • Изградба на потпорни ѕидови на повеќе локации во цела општина
    • Поставување канализациска мрежа во: Турско Маало, Ромско Маало, м. в. Горица, м. в. Ила
    • Асфалтирање на новопроектирани улици во м. в. Ила, индустриски дел Виница ‒Берово, м. в. Горица (главен пат Ловно ‒ Пролетер)
    • Донесување нови детални урбанистички планови и реевиденција на постојните за подобар развој на Општина Виница
    • Подобрување на уличното осветлување во цела Општина Виница
    • Редовно одржување на сите зелени површини и засадување нови садници во градот и населените места и изградба на нови паркови
    • Поставување јавни тоалети во градот
    • Проширување и подобра афирмација на музејот Теракота во Виница
    • Поддршка на постојните културни настани и проширување со нови
    • Подобрување на условите на пензионерските домови, поголема соработка на општината со Здружението на пензионери со поставување нови рекреативни места за самите пензионери
    • Нови детски забавни паркчиња со нови реквизити
    • Поставување повеќе фонтани и чешми во градот и населените места
    • Награди за најдобрите ученици во општината
    • Воведување нови спортски активности
    • Враќање на доделувањето стипендии за студенти од ранливи категории семејства
    • Ослободување од плаќање градинка за деца од ранливи категории семејства

село Јакимово

    • Асфалтирање на преостанатите улици во селото
    • Поставување бехатон-плочки на малите улици и на тротоарите
    • Довршување на водоводната мрежа
    • Поставување канализациска мрежа

село Трсино

    • Асфалтирање на преостанатите улици во селото
    • Поставување на бехатон во малите улици и сокаци
    • Зголемена и подобрена акумулација на водоводната мрежа на водоводот во селото
    • Довршување на канализациската мрежа
    • Подобрување на условите за движење на локалниот пат Трсино ‒ Голак

село Лески

    • Асфалтирање на преостанатите улици во селото
    • Поплочување со бехатон на малите улици и тротоарите
    • Изградба на рекреативно спортско игралиште за младите
    • Поставување канализациска мрежа

село Блатец

    • Асфалтирање на преостанатите улици и реконструкции на оштетените улиците со поставување нов асфалт
    • Поставување бехатон на малите улици (сокаци) и тротоарите
    • Довршување на патот до манастирот „Св. Илија“
    • Пренамена на интернатот во с. Блатец во дом за стари лица
    • Довршување со поставување нов асфалт на преостанатиот дел од патниот правец Блатец ‒ Детлово

село Грљани

    • Асфалтирање на преостанатите улици во селските маала
    • Тампонирање на земјоделските патишта и редовно одржување на постојните
    • Подобрување на водоводот и водата за пиење
    • Довршување на патот Балинци ‒ Витлате
    • ............
    • ............
    • ............

село Липец

    • Асфалтирање на преостанатите улици во селото
    • Поставување бехатон на малите улици и тротоарите
    • Подобрување на водоводната мрежа и реконструкција на селскиот водовод
    • Поставување канализациска мрежа

село Црн Камен

    • Асфалтирање на преостанатите улици во селото
    • Поставување бехатон на малите улици и тротоарите

село Виничка Кршла

    • Подобрување на патиштата во селските маала
    • Поставување бехатон на малите улици и тротоарите
    • Поврзување на главниот пат со патниот правец кон село Калиманци

село Истибања

    • Целосна регулација на Кајанечки Дол
    • Поставување бехатон на малите улици и тротоарите
    • Потпорни ѕидови и асфалтирање во маало Тумско
    • Поставување канализациска мрежа во другите делови во селото што не се поврзани со главната мрежа
    • Подобрување на водоводната мрежа во селото

село Лаки

    • Поплочување со бехатон на преостанатите улици во селото
    • Реконструкција на главната улица со поставување нов слој на асфалт
    • Довршување на водоводната мрежа

село Калиманци

    • Подобрување и асфалтирање и бехатонирање на локалните патишта што водат до селските маала
    • Подобрување на водоводната мрежа на селските маала
    • Одржување на главниот пат Јакимово ‒ Калиманци ‒ Грљани

село Пекљани

    • Асфалтирање на преостанатите улици во селото
    • Поставување бехатон на малите улици и тротоарите
    • Уредување на речното корито и изградба на мост
    • Довршување на канализациска мрежа

село Драгобраште

    • Асфалтирање на преостанатите улици во селото
    • Поставување бехатон на малите улици и тротоарите
    • Подобрување на водоводната мрежа во маало Чукарлии и маало Малчовци
    • Поставување канализациска мрежа во селото

село Трстија

    • Асфалтирање улица во селото
    • Подобрување на водоводната мрежа

село Градец

    • Проширување на главната улица во селото и поставување нов слој на асфалт
    • Асфалтирање на преостанатите улици во село Градец и новата населба Градец
    • Регулација на речното корито на Градечка Река во с. Градец
    • Довршување на канализациската мрежа
    • Поставување бехатон на малите улици и сокаци