МОЈАТА ВИЗИЈА
Зошто (повторно) се кандидирате? Што е мотивот?
Јас и жителите на Општина Илинден имаме директна релација, мене ме знаат како Жика Стојановски, како човек што четири мандати посветено ја вршеше службата на градоначалник еднакво за сите. Секојдневно се среќаваме и комуницираме на мојот број на телефон, кој 25 години е ист и не го менувам. Потребата општината да се врати на патеката на континуитет на раст од пред 4 години не е само потреба, туку и неопходност. Луѓето мене не ме знаат од вчера, туку од заедничка повеќегодишна неуморна работа. Во изминатите четири години општината беше во стагнација, во застој, без напредок, без видливи резултати и назадуваше. Мојот мотив е да се врати сјајот на Општина Илинден, да се активира потенцијалната енергија, да се реализира визијата Општина Илинден повторно да биде лидер во сите области од работењето и живеењето. Кандидатурата ја гледам како можност и предност со која дефинитивно со сигурност ќе се промени постојната ситуација, трендот на опаѓање и уназадување на Општина Илинден како локална заедница. Мојот мотив е да постигнеме ефективни резултати, сите заедно, сплотени за идните генерации, за генерациите што растат, за младите. Мојата посветеност на напредокот на локалната самоуправа се заснова врз идеја, планирање, градење, креирање самоодржлива општина и раст на квалитетот на животот и среќата на луѓето што живеат во неа. Тоа е најдобриот рецепт за следните четири години, за мојот петти мандат заедно со вас, драги сограѓани. Сето ова го имам на ум кога зборувам за нашата успешна заедничка работа и нашите достигнувања. Сите ние го знаеме сето тоа. Но понекогаш е неопходно да се повториме, да се потсетиме и да бидеме уште посвесни за тоа. А предизборното време, времето кога се ближат изборите за нов мандат, е такво време. И затоа го повторувам тоа сега секој ден. Ние сега зборуваме за нашето живеење и благосостојба во следниот период, за следните четири години. И сакам да продолжиме да работиме заедно, тоа е мојата цврста одлука и намера. И тоа можам да го сработам само заедно со вас. Со вашата поддршка, со ваше прифаќање, исто како што работевме во минатите години.
Колку е важно да се има визија за општината, за нејзино подобро функционирање и за нејзин развој. Дали во тој контекст е потребно да се има и визија за општеството во целина?
Имаме јасна визија, Општина Илинден е препознатлива, потврдена, економски силна, урбана општина со современи услови за живеење и стопанисување, каде што образованието, знаењето и информациско-комуникациската технологија (ИКТ) се императив за растечкиот стандард на човечкиот капитал. Локалната власт без визија реагира само на инцидентни проблеми, секогаш доцни, не е насочена е кон барање решенија и одговори, туку изговори. Со јасна визија и мисија знаеме на што сме посветени, кои се нашите приоритети и како да ги реализираме, знаеме како да управуваме со современите фактори на растот на локално ниво и градење локална самоуправа заснована врз знаење. Значајно е да потенцирам дека при планирањето на нашите секојдневни активности, треба да размислуваме за идните генерации и да им искажеме почит и признание на претходните генерации. Во суштина, одржливиот развој е процес на промени во кој користењето ресурси, насочувањето инвестиции, ориентација на техничкиот и технолошкиот развој и институционалните промени се во хармонија и ги зголемуваат како сегашните, така и идните потенцијали со цел да се задоволат човечките потреби и аспирации. Во тој контекст , потребно е да се има визија за општеството во целина, Македонија како земја во развој треба да ја гради својата визија во функција на подобрување на животот на секој човек, кој низ развојот треба да се потврди како креатор на нови можности, реализатор на различните аспекти на колективното живеење и партнер во глобалните економски и општествени процеси.
Што е тоа што сметате дека мора да се направи во следниот мандат и натаму? Нешто што ќе направи промена. Дали е доволно да се понудат само инфраструктурни проекти?
Технолошкиот развој и информациско-комуникациската технологија особено напредува и носи нови можности за развој на работењето, управувањето, безбедноста и давањето општински услуги. Таков експанзивен тренд се очекува и во иднина, а Општина Илинден потребно е и мора да биде една од најнапредните, најактивните и најатрактивни општини во Македонија и во регионот, имаме цел целосно искористување на силните страни и човечкиот капитал, коишто ќе придонесат за подобар квалитет и услови за живеење и работење на своите граѓани. Мојата заложба е:
а) Образование и човечки капитал Нашите деца се нашиот најголем ресурс. Градинките, основните и средните училишта се достигнувања и основа за висококвалитетно образование усогласено со европските стандарди. Ние мораме да се осигуриме дека овие институции обезбедуваат модерно образование. Дигитална писменост, странски јазици, STEM-програми - ова веќе не се луксуз, туку се неопходни потреби вклучени во образованието. Исто така, мора да инвестираме во доживотно учење, давајќи им на возрасните можности за преквалификација и надградба на вештините. Во свет каде што технологијата и индустријата вршат брзи промени, нашите граѓани секогаш треба да бидат во тек.
б) Инфраструктура и животна средина Урбанизацијата мора да биде паметна и одржлива. Мора да се оддалечиме од идејата дека само инфраструктурата е доволна. Патиштата и објектите се важни, но тие се само. Нашата заложба е модернизација на инфраструктурата, патиштата, јавниот превоз и комуналните услуги, со силна посветеност и фокусирање на еколошката одговорност, заштита на животната средина и здравјето на луѓето. Зелените површини, чистата вода, проектите за обновлива енергија и одржливо интегрирано управувањето со отпадот мора да бидат дел од пакетот. Општина Илинден не само што треба да расте туку и треба да се развива правилно, чисто и здраво.
в) Економија и работни места
Локалните економски зони остануваат една од нашите најсилни страни и можности. Со привлекување инвестиции и проширување на постојните, можеме да создадеме нови работни места, но не какви било работни места – туку сигурни, достоинствени, постојани, безбедни, со поголема додадена вредност, работни места што им даваат на луѓето причина да останат и иднина во која можат да веруваат. Исто така, мора да ги поддржиме напредните мали бизниси, стартап-компаниите со поголема додадена вредност, и младите претприемачи, со гаранции, со сигурност, обезбедувајќи им ја инфраструктурата и регулаторната рамка што им се потребни за да напредуваат.
г) Транспарентност и доверба Секој напредок ќе биде бесмислен без доверба. Граѓаните мора да знаат што работиме, што правиме, како и зошто го правиме тоа. Буџетите, тендерите, проектите - тие мора да бидат отворени, достапни и разбирливи. Транспарентноста не е слоган, таа е основа на кредибилитетот. Со воведување дигитален пристап до општинските услуги, вештачка интелигенција, управување и контрола на постапките за јавни набавки, транспарентност во јавните средства и искоренување на корупцијата, особено во јавната администрација, комуналните претпријатија и јавните набавки, се разбива стравот од предрасуди и ригидноста на администрацијата.
д) Заедница и идентитет
Конечно, мора да запомниме дека локалната самоуправа не е само патишта и буџети. Тоа се луѓе, култура, традиции и обичаи. Мора да го поттикнеме и да го негуваме чувството дека Општината Илинден е заедница на која вреди да се припаѓа, место каде што постарите лица се чувствуваат почитувано, младите се чувствуваат ангажирано, активни, исполнети, а семејствата се чувствуваат сигурно и безбедно.