Особено во зимските месеци македонските градови се меѓу најзагадените во светот. Во многу места имаме проблем со диви депонии, а граѓаните имаат сериозни забелешки за јавната чистота дури и во најурбаните места. Осудени ли сме сите ние да живееме во ѓубре и отровен воздух?
Не сме осудени. Проблемот со загадувањето и нечистотијата е прашање на систем, култура и политичка волја. Општина Крушево има дефинирано локален акциски план за управување со отпадот во кој е поставена основата за интегрирано управување со отпадот во Крушево и за основање центар за секундарна селекција на отпадот на парцелата на поранешната кланица и затворање на депонијата во согласност со регионалното управување со отпад.
Довербата на граѓаните во системот е на многу ниско ниво, а општата перцепција на јавноста е дека корупцијата цвета во нашата држава. Дали можеме да ја повратиме таа доверба? Дали подобрувањето на општинските услуги, зголемувањето на транспарентноста и отвореноста на општината кон граѓаните може да даде нова надеж?
Да, довербата може и мора да се врати – но тоа се прави со дела, а не со зборови. Во дoсегашното работење покажавме и докажавме целосна транспарентност, отчетност и домаќинско работење.
Иселувањето е еден од најголемите проблеми, а следствено и наталитетот е во драстично опаѓање. Имаме ли иднина без луѓе? Како да ги задржиме луѓето да продолжат да живеат во своите места со перспектива за себе и за своите деца?
Иселувањето и нискиот наталитет се аларм кој трае со години, а решението не е едноставно. Воведовме мерки за поддршка на семејствата со новороденче, стипендирање на учениците од општината во средното образование во Крушево, градиме партнерски однос со приватниот сектор со поддршка на дуалното образование, организираме спортски активности и настани. Само така Крушево ќе има иднина со луѓе кои ќе останат, ќе создаваат и ќе градат тука.
Зошто граѓаните да гласаат за вас? Што е тоа по што сте различни од другите за да ви ја дадат токму вам довербата?
Мојот пристап е фокусиран на дела, на реални решенија, одговорно со чесна работа и со континуирана посветеност. Тоа, во текот на двата мандати, го покажавме и докажавме со конкретни резултати.
