Опис на проектот

Изградба на нова современа спортска сала во рамките на ЦОУ„ Алија Изетбеговиќ“-Љубош.
Со оваа инвестиција ќе обезбедиме:
- Современи услови за настава по физичко образование за сите ученици, во безбеден и затоплен објект, соодветен за цела учебна година.
- Можност за воннаставни и спортски активности, училишни натпревари и тренинзи.
- Отвореност на салата за користење од страна на младински и спортски клубови во попладневните часови.
- Целосна опременост со реквизити, соблекувални и санитетски јазли.
- Објект со енергетска ефикасност и пристапност на сите ученици, вклучувајќи ги и лицата со попреченост.

Љубош и учениците на ЦОУ „Алија Изетбеговиќ“ го заслужуваат тоа.
Со ваша поддршка оваа спортска сала ќе стане реалност, а не само ветување.

Влијание на проектот:

Одвивање на нормална настава по физичко образование на нашите деца како што и заслужуваат. Доста беше губење часови по физичко образование веќе неколку години, особено во зимските месеци.

Целна група: Сите ученици од училиштето

Рок на реализација: 2027 година

Опис на проектот

Изградба на нови детски градинки - инвестиција во иднината.

Како дел од нашата посветеност за подобра иднина на секое дете и секое семејство, ние се обврзавме на:
- Изградба на нови модерни детски градинки во нашите села што ќе ги исполнуваат сите стандарди за безбедност едукација и грижа за најмладите.
- Градинките да бидат со голем капацитет да нема деца што ќе чекаат ред т.е. да бидат на листи за чекање.
- Вработување стручен и обучен кадар, со поддршка за постојана едукација на воспитувачите и негувателите.
- Инвестирање во екоградба и енергетска ефикасност, со цел градинките да бидат безбедни, здрави и економски одржливи.
- Обезбедување бесплатна градинка на деца од семејства со ниски приходи, како дел од нашата социјална и семејна политика.

Влијание на проектот:

Веруваме дека инвестицијата во детската заштита е најважна инвестиција што може да ја направиме - затоа изградбата на нови градинки е врвен приоритет во нашиот мандат.

Во нашата општина нема ниедна градинка, децата се носат во Кисела Вода, ако се најде место.

Целна група: Нашите најмали, како и родителите кои спокојно ќе ги извршуваат своите работни обврски

Рок на реализација: 2027 година

Опис на проектот

Во с. Долно Количани во 21 век – нашите сограѓани сè уште пијат вода од цистерни, се бањаат со садови и кофи и без капка вода за основните потреби. Ова не е срам за една општина - ова е неправда што трае со години.

Нема правда додека:
- Децата растат без пристап до чиста вода.
- Жените и старите секој ден влечат кофи како во минатиот век.
- Семејствата се борат со жед и хигиенски ризици во летни горештини.
Како советничка група на СДСМ, јавно и одговорно бараме:
- Итно започнување постапка за проект за водоснабдување во Долно Количани.
- Привремено, но редовно и организирано снабдување со цистерни, а не само пред избори.
- Вклучување на државни институции и средства од централниот буџет
Ќе ја отвораме темата на секоја седница и нема да отстапиме додека секој дом во Долно Количани не добие вода.

Влијание на проектот:

Водоснабдувањето е основно човеково право, па затоа незамисливо е во 21 век едно населено место во непосредна близина на главниот град, да биде без чиста вода за пиење. Затоа, со овој проект ќе се реши еден горчлив проблем што го имаат жителите на Долно Количани.

Целна група: Жителите на с. Долно Количани

Рок на реализација: 2028 година

Опис на проектот

Жителите покрај регионалниот пат заслужуваат канализациска мрежа.

Во 21 век, покрај регионалниот пат низ Батинци и Љубош, жителите се без основна канализациска мрежа.
- Некои домови се снаоѓаат со стари или нефункционални септички јами.
- Повеќето, без избор, ги испуштаат отпадните води директно во Маркова Река.
- Реката се претвори во отворен колектор со загадување, неподнослив мирис и опасност за здравјето.
Ова не е инфраструктурен проблем - ова е еколошка катастрофа во најава и јавно здравствен ризик за целото население.
Како советничка група на СДСМ, со полна одговорност и поддршка од граѓаните, бараме изработка на целосен проект за канализациска мрежа за населението покрај регионалниот пат.
- Интегрирање на системот и изградба на прочистителни станици.
- Вклучување на државни и европски фондови за финансирање.
- Привремени, но регулирани решенија за отпадните води сѐ додека трае изградбата.
- Активна улога на инспекциите - да се спречи директно истекување на отпадните води во Маркова Река.
Батинци не смее да биде заборавена зона без канализација.
Со ваша поддршка, ќе се избориме канализацијата да биде реалност, не луксуз.

Влијание на проектот:

Обезбедена канализација, почиста околина и поздрава средина

Целна група: Целото население

Рок на реализација: 2027 година

Опис на проектот

Маркова Река некогаш природна гордост и извор на живот - денес претворена во дива депонија и канал за отпадни води.

Сведоци сме на сѐ поголемата узурпација на речното корито од мали инвеститори, нелегално истекување на отпадни води од приватни фирми, како и фрлање смет од страна на несовесни и неодговорни поединци.
Ова не е само еколошки проблем - ова е закана за јавното здравје, за животната средина и за иднината на нашите деца.
Како советничка група од СДСМ ќе бараме итно:
- Спроведување инспекциски надзор врз објектите што испуштаат отпадни води.
- Чистење и санирање на загадените делови од речното корито.
- Јавно обелоденување на фирмите што загадуваат - одговорност мора да има.
- Поставување контејнери и организирана едукација на граѓаните против нелегално фрлање отпад.
- Изработка на долгорочен план за уредување и заштита на Маркова Река во соработка со институциите и еколошки организации.
Ние нема да останеме неми. Нашата борба за здрава животна средина продолжува - гласно одговорно и во интерес на сите наши жители.
Со ваша поддршка ќе ја вратиме Маркова Река на жителите на нашата општина.

Влијание на проектот:

Чиста и здрава животна средина

Целна група: Сите жители на с. Батинци

Рок на реализација: 2027 година

Опис на проектот

Во општина Студеничани живеат илјадници жени, но нема ниту една гинеколошка ординација, а значи:
- Жените патуваат километри за основен преглед.
- Младите девојки немаат пристап до едукација и превентивна заштита.
- Бремените жени се принудени да одат во Скопје или Драчево за секоја контрола.
- Ризиците за здравјето растат – а институциите молчат.

Ова е запоставување, ова е дискриминација. И ова мора да се смени.
Како советничка група на СДСМ, со целосна поддршка од граѓаните ќе бараме:
- Отворање на најмалку две гинеколошки ординации во рамките на јавното здравство, на територијата на Општина Студеничани.
- Соработка со Министерството за здравство и Здравствен дом – Скопје за обезбедување кадар и простор.
- Мобилни гинеколошки пунктови додека не се обезбеди трајно решение.
- Кампањи за превентивни прегледи и гинеколошка едукација.
- Рамноправен пристап до здравје – без разлика село, град или финансиска состојба.
Здравјето на жената е здравје на семејството и на заедницата!
Жените од Студеничани не бараат привилегии – бараат основна грижа, почит и здравствена заштита.
Ние нема да молчиме – ќе бараме, ќе предложиме, ќе притискаме – сè додека оваа неправда не се исправи.

Влијание на проектот:

- Подобрување на пристапот до здравствена заштита.
- Намалување на смртноста кај новороденчињата.
- Превенција и рано откривање болести.
- Едукација и подигање на свеста.
- Подигање на животниот стандард на жителите во руралните средини.
- Создавање работни места и економски развој на средината.
- Зголемување на довербата во здравствениот систем.

Целна група: Жените

Рок на реализација: 2027 година

• Водовод во Дрешница.
• Отворање гинеколошка ординација.
• Изградба на канализација на регионалниот пат.

• Изградба на детска градинка.
• Спортска сала во ЦОУ „Алија Изетбеговиќ“.
• Изградба на игралиште за деца.

• Водовод.
• Поплочување на неколку помали улици.

• Изградба на детска градинка.
• Гинеколошка ординација.