Мојата визија за развојот на Општина Ѓорче Петров се темели на политики што директно го подобруваат квалитетот на живот на граѓаните и што создаваат чувство на припадност и перспектива.
Децата и раниот детски развој ќе бидат еден од клучните приоритети на новата локална власт. Во таа насока особено внимание ќе се посвети на квалитетот на згрижувањето, образованието и воспитувањето на децата во предучилишното и основното образование.
Нашите цели се: предучилишно образование за секое дете, без „листи на чекање“, основно образование што целосно ќе може да одговори на сите предизвици на новото време, инклузивно образование за сите, со современи, енергетски ефикасни објекти, со опремени спортски сали, со зелени и уредени дворови, адаптирани и пристапни за децата со попреченост.
Младите мораат да ја почувствуваат Општината како место каде што имаат улога и каде што имаат иднина. За таа цел е неопходно нивното учеството во процесот на креирање на младинските политики и во создавањето и носењето на локалната стратегија за млади.
Нашиот коцепт за остварување на овие цели, подразбира: функционален локален младински совет и отворање на младинска канцеларија, финансиска и материјална поддршка од областа на јавните дејности за младите, процент од буџетот за младите во Општината, создавање дата база со образовни и социјални профили на млади на возраст од 18 до 29 години коишто се невработени, овозможување практика и евентуален работен ангажман на младите зависно од потребите на компаниите и од образовниот профил на младите.
Покрај тоа, младите ќе бидат вклучени во креирањето и организација на културни и спортски настани, фестивали, филмски вечери, турнири и волонтерски акции – за да го почувствуваат духот на заедништвото.
Жените, како една од клучните општествени групи, заслужуваат поголема поддршка. Затоа ќе бидат развиени програми за нивно економско јакнење преку обуки, менторство и финансиска поддршка за женското претприемништво. Општината ќе инвестира и во подобрувањето на услугите за згрижување на децата, што директно ќе им помогне на семејствата, а ќе бидат реализирани и кампањи за превенција и за борба против семејното насилство. Жените ќе добијат и поголема улога во јавниот живот преку формирање советодавни групи, форуми кои ќе учествуваат во креирањето локални политики.
Највозрасните наши жители се важен дел од нашата општина. Нивното животно искуство, знаењето и вредностите се богатство што мора да се почитува и да се користи. Затоа, ќе дејствуваме во две насоки – да им обезбедиме грижа, поддршка и достоинствен живот, но и активно да ги вклучиме во секојдневното функционирање на Општината. Само така ќе изградиме заедница која навистина се грижи за сите генерации.
За таа цел, пензионерите и пензионерските здруженија ќе бидат вклучени во јавните дискусии за креирање на буџетот и на програмите на Општината, а ќе се обезбедат соодветни простории за пензионерските клубови и ќе бидат поддржувани за организацијата на спортски, културни и друштвени активности за највозрасните. Исто така ќе обезбедиме помош на социјално ранливите лица, како и финансиска поддршка за дневните центри и други активности за старите лица.
Ќе градиме општина со еднаква грижа за сите, ќе креираме и спроведуваме мерки за спречување и намалување на социјалните ризици, на сиромаштијата и на исклученоста – со посебен фокус на лицата со попреченост и социјално ранливите граѓани.
Во областа на образованието, ќе вложуваме во современото образование, преку опремување на училиштата со неопходните нагледни средства и помагала, со ИКТ-уреди (смарт табли, лап-топ уреди, ЛЦД-проектори и сл.) и со обезбедување на квалитетни интернет-конекции.
Особен акцент ќе се стави на инклузивноста, и на обезбедувањето соодветен пристап до училиштата за сите деца.
Во рамките на концептот за поддршка на образованието ќе обезбедиме и: бесплатна ужинка за сите ученици од прво до петто одделение, стипендии за десетте најдобри ученици од секое основно училиште, награди за учениците со постигнати резултати на натпревари, покривање на трошоците за учество на натпревари, формирање паралелки за продолжен престој и целодневна настава во сите училишта.
Културата ќе биде двигател на заедништвото и важен елемент за промоција на Општината. Активно ќе работиме на поддршка и афирмација на младите таленти, уметници, поети и писатели меѓу кои и млади пејачи како и на поп- и рок-бендови. Како и на поддршката, афирмацијата и негувањето на македонскиот фолклор и традиција, и општо на доближувањето на културата до граѓаните во Општината. Во таа насока, како општина ќе организираме голем број настани од областа на културата и ќе обезбедиме: финансиска и административно-техничка поддршка за здруженија на граѓани, културно-уметнички друштва и физички лица, поддршка на иновативни проекти со кои се унапредува социјалната инклузија на лицата со попреченост и заживување на просторот за кинопроекции во Домот на културата.
Спортот и рекреацијата ќе ги развиваме во две насоки, едната е постигнување поголема мотивираност и вклученост на младите, децата и лицата со попреченост како и на генерациите на сите возрасти во спортско-рекреативни активности. И за таа цел ќе работиме на обезбедување на соодветна инфраструктура, организирање масовни спортски настани – маратони, велосипедски тури и турнири, а ќе обезбедиме и финансиска и материјална поддршка за истакнати и талентирани млади спортисти.
Другата насока е развој на колективните спортови и за таа цел ќе обезбедиме финансиска и материјална поддршка за спортските клубови, спортските школи и сите традиционални турнири, натпревари и трки.
Во однос на транспортот и мобилноста, ќе се спроведуваат едукативни програми за безбедност во сообраќајот, особено за најмладите, а ќе се поттикнува и користењето на велосипед и јавен превоз преку субвенции и со подобрување на условите.
Животната средина ќе биде централна тема. Ќе се пристапи кон замена на конвенционалните системи за греење во јавните објекти со нови еколошки системи на принцип на топлински пумпи. Ќе се воведат едукативни програми за рециклирање во училиштата, ќе се организираат акции за садење дрвја и чистење на просторот во кои ќе учествуваат граѓаните, како и поддршка на локални здруженија што работат во областа на екологијата.
Конечно, довербата на граѓаните ќе се зајакне со вистинска транспарентност. Ќе има отворени денови на градоначалникот, електронски систем за предлози и поплаки, како и буџетски форуми каде што граѓаните директно ќе учествуваат во определување на приоритетите на Општината.