Особено во зимските месеци македонските градови се меѓу најзагадените во светот. Во многу места имаме проблем со диви депонии, а граѓаните имаат сериозни забелешки за јавната чистота дури и во најурбаните места. Осудени ли сме сите ние да живееме во ѓубре и отровен воздух?
Одбивам да се помирам, до крајот на мојот живот да живееме како во една голема депонија. Дивите депонии мора да се лоцираат, а тие што ги создаваат да се санкционираат. Како лекар, за мене е најважно здравјето на граѓаните, а за тоа е важно и редовното чистење и миење на улиците, дезинфекција на контејнерите за отпад, редовно собирање на отпадот, вклучително и воведување систем за рециклирање.
Довербата на граѓаните во системот е на многу ниско ниво, а општата перцепција на јавноста е дека корупцијата цвета во нашата држава. Дали може да ја повратиме таа доверба? Дали подобрувањето на општинските услуги, зголемувањето на транспарентноста и отвореноста на општината кон граѓаните може да даде нова надеж?
Можеби довербата лесно се стекнува, но еднаш изгубена, таа многу потешко се враќа. Единствен начин да се врати довербата на граѓаните во институциите е тие да си ја работат својата работа. За мене е едноставен маркетинг и популизам барањето аплаузи за тоа што во суштина треба да го сработиме бидејќи е наша надлежност. Граѓаните бараат функционалност, транспарентност, отчетност и добра соработка, и сметам дека тоа е единствениот начин.
Иселувањето е еден од најголемите проблеми, а следствено и наталитетот е во драстично опаѓање. Имаме ли иднина без луѓе? Како да ги задржиме луѓето во своите места да продолжат да живеат со перспектива за себе и за своите деца?
Младите сакаат да ја напуштат татковината токму поради нефункционалноста на институциите, клиентелизмот, коруптивноста, неказнивоста. Младите очекуваат од нас да ги испорачуваме суштинските потреби на општеството и затоа, само од нашето работење и дејствување зависи каква порака ќе им испратиме.
Зошто граѓаните да гласаат за вас? Што е тоа по што сте различни од другите за да ви ја дадат токму вам довербата?
Во мојата сфера на работење, како анестезиолог на Клиниката за анестезија, реанимација и интензивно лекување, како нејзин раководител, но и како национален координатор за трансплантација, сум покажала и докажала што значи транспарентно, чесно и посветено да се работи за доброто на пациентите, следејќи ги доследно сите етички принципи. Мојот патриотизам го гледам во мојата желба и посветеност за подобро утре на пациентите што сум ги лекувала и таа посветеност и енергија сакам да ја ставам во функција на граѓаните на Карпош, кои сакам да ги предводам.
