МОЈАТА ВИЗИЈА
Зошто се кандидирате? Што е мотивот?
Се кандидирам затоа што сум битолчанец којшто цел живот живее овде, сопруг и татко на три деца. Ги гледам истите проблеми што ги гледаат моите сограѓани – сообраќаен хаос, загаден воздух, отпад што секојдневно нѐ притиска, недостиг од зелени површини и нефункционалните јавни претпријатија. Моја мотивација е моето семејство, но и секој граѓанин што сака подобар живот во Битола. Верувам дека со визија, ред и чесна работа можеме да ја вратиме гордоста на нашиот град.
Колку е важно да се има визија за општината, за нејзино подобро функционирање и за нејзин развој. Дали во тој контекст е потребно да се има и визија за општеството во целина?
Визијата е основа за секој развој. Ако не знаеме каде сакаме да стигнеме, ќе тапкаме в место. За мене, визија за општината значи јасна слика за тоа како сакаме Битола да изгледа за 5, 10 или 20 години – модерен, уреден и зелен град, со функционален јавен транспорт, со можности за младите, со јавни претпријатија штоќе бидат сервис, а не проблем. Но, визијата не застанува тука – таа мора да биде дел од пошироката визија за општеството. Без праведност, без вреднување на трудот и без систем штого става човекот, пред сè, не можеме да одиме напред.
Што е тоа што сметате дека мора да се направи во следниот мандат и натаму? Нешто што ќе направи промена. Дали е доволно да се понудат само инфраструктурни проекти?
Инфраструктурата е важна, но таа е само алатка, а не цел сама по себе. Патишта, улици и паркови се неопходни, но најважно е да изградиме функционален систем. Потребна е отворена и услужна општина, ни требаат јавни претпријатија штонавистина ќе работат за граѓаните, ќе го собираат отпадот навремено, ќе ги чистат улиците, ќе одржуваат јавни површини. Потребно е решавање на сообраќајниот хаос со нови паркинг-решенија и паметно урбанистичко планирање. Само тогаш инфраструктурата ќе биде основа за вистинска промена.
